Loading…

फिफा विश्वकपमा उपविजेता बनेको क्रोएसिया स्पेनसँग ६-० ले पराजित

0
Shares

म्याड्रिड (एजेन्सी) – रुसमा सम्पन्न फिफा विश्वकपमा उपविजेता बनेको क्रोएसिया यूईएफए नेसन्स लिग अन्तर्गत मंगलबार राती भएको खेलमा स्पेनसँग ६-० ले पराजित भएको छ ।


शनिबार भएको खेलमा इंग्ल्यान्डलाई २-१ ले पराजित गरेको स्पेनले क्रोएसियालाई पराजित गर्दै लिगमा लगातार दोस्रो जित दर्ता गर्यो । साउल निगुएजले पहिलो हाफको २४ औं मिनेटमा हेडरमार्फत गोल गर्दै अग्रता दिलाएका थिए । मार्को एसेन्सियोले ३३ औं मिनेटमा २० यार्ड टाढाबाट गोल गर्दै अग्रता दोब्बर पारे । लगत्तै उनकै शक्तिशाली प्रहार पोस्टमा लागेर फर्कने क्रममा गोलरक्षक लोभ्रे कालिनिचलाई लाग्दै गोलमा परिणत हुन् पुग्यो ।

दोस्रो हाफमा स्पेनले दबदबा कायम नै राख्यो । रोड्रीगोले दोस्रो हाफ सुरु भएको चौथो मिनेटमा गोल गरे । त्यसको ९ मिनेटपछि कप्तान सर्जियो रामोसले कर्नरमा हेडर गोल गर्दै ५-० को अग्रता दिलाए । रियल म्याड्रिडका मिडफिल्डर इस्कोले पेनाल्टी क्षेत्रभित्रबाट उत्कृष्ट फिनिस गर्दै ७० औं मिनेटमा गोल गर्दै ६-० को फराकिलो अन्तर कायम गरे ।


क्रोएसियाले विश्वकप फाइनल खेलेका ४ खेलाडीलाई मात्र सुरुआती ११ मा उतारेको थियो । गोलरक्षक ड्यानीएल सुबासिच र फरवार्ड मारियो मान्जुकीचले सन्न्यास लिइसकेको अवस्थामा युवा खेलाडीले मौका पाएका थिए । डिफेन्समा दोमगोज भिडा र मिडफिल्डमा कप्तान लुका मोड्रीच, इभान राकीटिच र इभान पेरिसिचले फराकिलो हार टार्न सकेनन् ।

यो क्रोएसियाको सबैभन्दा ठूलो हार पनि हो । जितसँगै नेसन्स लिगको ए४ समूहमा स्पेन ६ अंकसहित शीर्ष स्थानमा छ । इंग्ल्यान्ड र क्रोएसियाले कुनै अंक जोडेका छैनन् । दुवै टोली अक्टोबरमा हुने खेलमा आमनेसामने हुनेछन् ।

तपाईंको प्रतिकृयाहरू
0
Shares

Loading…

Loading…