Loading…

बालिकालाई ‘अनुपयुक्त ढंगले’ चुम्बन गरेको आरोपमा चर्चित गायक प्यापोन विवादमा, शोबाट हटाइए

0
Shares

मुम्बई । प्यापोन भनेर चिनिने भारतका चर्चित गायक अन्गारग महन्त एक बालिकालाई अनुपयुक्त ढंगले चुम्बन गरेको कारण विवादमा तानिएका छन् ।

एण्ड टिभी च्यानलबाट प्रशारित हुने भ्वाइस इन्डिया किड्सका निर्णायकहरु मध्ये एक रहेका प्यापोनले कार्यक्रमकै सहभागी एक बालिकालाई चुम्बन गरेका थिए ।

कार्यक्रममा सहभागी बालबालिकाहरुसँग होली मनाउँदै गरेको भिडियो फेसबुक लाइभका दौरान ११ वर्षीया बालिकालाई चुम्बन गरेका थिए । उनको यस हर्कतको सामाजिक सञ्जालमा व्यापक आलोचना भएको थियो ।

आलोचना भएपछि टेलिभजिन च्यानलले उनलाई कार्यक्रमबाट हटाइएको वक्तव्य जारी गरेको छ ।

प्यापोनले मागे माफी

यता, प्यापोनले पनि एक व्यक्तव्य जारी गर्दै आफूले कुनै पनि गलत नियतले बालिकालाई चुम्बन नगरेको स्पष्टिकरण दिएका छन् । आफ्नो गलत नियत भए कसैले पनि फेसबुक लाइभमा यस्तो हर्कत नगर्ने उनको तर्क थियो ।

उनले अहिले कुनै पनि महिलालाई छुनु, चाहे त्यो सही नियतले किन नहोस्, गलत ठहरिने बेलामा आफूले गरेको व्यवहार प्रति माफी पनि मागेका छन् ।

उनले ती बालिकाको परिवारले यसलाई नाकारात्मक ढंगले नलिरहेको अवस्थामा बिनाकारण यो मुद्दालाई ठूलो बनाएर दुईवटा परिवारको जीवन बबार्द नपार्न आग्रह गरेका छन् । प्यापोनको परिवारमा श्रीमती र दुई सन्तान रहेका छन् ।

११ वर्षीया बालिकाको पिताले पनि मिडियालाई यो मामिलालाई बढाई–चढाई नगर्न आग्रह गरेका छन् ।

मिश्रित प्रतिक्रिया

प्यापोनको यस हर्कतबारे मिश्रित प्रतिक्रिया आएको छ । केहीले उनको समर्थन गरेका छन् भने केहीले उनको ब्यापक आलोचना गरिरहेका छन् । नायिका रविना टण्डनले प्यापोनमाथि कारवाहीको माग गरेका छिन् भने फराह खानले उनको हर्कत सही नभएको प्रतिक्रिया दिएकी छिन् ।

प्यापोनको मोह मोह के धागे, जिये क्यूँ जस्ता गीतहरु चर्चित रहेका छन् ।

तपाईंको प्रतिकृयाहरू
0
Shares

Loading…

Loading…